Prosedimentu di kambio ANG pa XCG

Den kuadro di introdukshon di florin karibense dia 31 di mart 2025 i e proseso relashoná ku kambiamentu disèn kèsh di florin di Antia Hulandes (ANG) pa florin karibense (XCG), Centrale Bank van Curaçao en SintMaarten (CBCS) ta publiká e prosedimentunan di kambio pa medio di esaki:

1. CBCS ta kumpli ku reglanan vigente pa kombatí labamentu di plaka i finansiamentu di terorismo (AML/CFT/CFP) ora di realisá kambio.
2. Personanan (hurídiko) ku tin kuenta na banko komersial mester kambia nan ANG na nan mes banko komersial. Esaki por hasi durante e periodo di 31 di mart 2025 te ku 31 di mart 2026. Despues di e periodo akí, kambio di ANG pa XCG lo ta posibel solamente na CBCS, ku un límite final pa kambio fihá pa 31 di mart 2055. Tene na kuenta ku bankonan komersial lo stimulá prinsipalmente depósito riba kuenta bankario.
3. Personanan (hurídiko) ku no tin kuenta na banko i/òf ku ke kambia plaka di papel dañá òf moneda, por akudí na CBCS un biaha so sin sita pa kambia un kantidat di ANG ménos ku ANG 2.500, kuminsando dia 31 di mart 2025.
4. Pa kambia sumanan ku ta surpasá ANG 2.500,mester hasi un sita online via https://www.centralbank.cw/exchange-request i yena un formulario di ‘Source of Funds’[1] (SOF) di antemano. CBCS lo konfirmá e sita viae-mail ku e persona (hurídiko) indiká.
   
5. Riba dia di e sita, CBCS lo kambia e sèn, a ménos ku tin sospecho ku ta trata di un echo penal. CBCS lo hasi investigashon basá riba dokumentonan ku a entregá. Si durante e investigashon ta sali preguntanan riba kua e persona (hurídiko) no por duna kontesta (satisfaktorio), i si sigui eksistí e sospecho di un echo penal, e sèn ku a entregá pa kambia lo ser retené konforme artíkulo 6 insiso 6 di e Statüt di Banko.
6. Den kaso di retenshon di e sèn, e persona (hurídiko) lo risibí un desishon motivá di CBCS. Kontra esaki, e persona (hurídiko) por hasi opheshon na e komishon di konseho di LAR di CBCS, òf por hasi un apelashon atministrativo na Korte di promé instansia. CBCS lo hasi notifikashon na FIU i Ministerio Públiko den kaso di retenshon di sèn. E resultado di investigashon di e instansianan aki i/òf e desishon di komishon di konseho di LAR, òf di hues, lo determiná si i ki ora e sèn ku a ser retené lo ser kambiá.
7. E kambio di sèn lo ser hasí na sèn kèsh. CBCS no lo transferí e suma kambiá pa un kuenta bankario.