Pregunta risibí frekuentemente

Riba 10 di òktober 2010, Kòrsou i Sint Maarten a bira pais outónomo den Reino Hulandes. E paisnan a forma un union monetario ku un banko sentral i un moneda nobo komun. Den e “Regeling Gemeenschappelijk Geldstelsel Curaçao en Sint Maarten”, ku ta regla e moneda ku e union monetario di e dos paisnan akí ta usa, ta stipulá ku florin karibense (Cg) ta bini na lugá di florin di Antia Hulandes (NAf.).

E florin karibense ta método legal di pago entrante 31 di mart 2025

Meskos ku ta e kaso ku florin antiano, florin karibense ta mará legalmente na dòler merikano ku un tasa di kambio fiho di US$ 1 = 1,79.

E tasa di kambio di florin di Antia Hulandes pa florin karibense ta 1:1. Balor di florin di Antia Hulandes ta igual na di florin karibense.

E dos monedanan lo ta den ko-sirkulashon pa tres luna for di 31 di mart 2025.

Lo aseptá pago ku florin antiano te ku 3 luna despues di introdukshon di florin karibense riba 31 di mart 2025. Esaki ta nifiká ku por hasi pago kèsh den NAf. te ku 30 di yüni 2025. Lo bo risibí kambio (prinsipalmente) den florin karibense.

Por hasi kambio na e banko komersial ku bo tin kuenta bankario serka dje te ku 12 luna despues di introdukshon di florin karibenese. Esaki ta nifiká ku 31 di mart 2026 ta e último dia pa kambia ANG na bankonan komersial. Sin embargo, despues di e 12 lunanan akí, bo por kambia bo florin antiano ainda na CBCS pa un periodo di 29 aña - te ku 31 di mart 2055. Por fabor tira un bista riba e página aki tokante e prosedimentu di kambio pa mas informashon.

Si bo no tin un kuenta di banko na un banko komersial, bo por kambia bo florin antiano na CBCS pa un periodo di 30 aña - te ku 31 di mart 2055. Por fabor tira un bista riba e página aki tokante e prosedimentu di kambio pa mas informashon.

Kambio te NAf 2,500, ta posibel un biaha sin sita. Pa kambio di montante mas haltu ku NAf 2,500 òf pa hasi kambio pa di dos biaha, ta nesesario pa traha un sita. Por kambia florin antiano na CBCS te ku 31 di mart 2055

Por fabor tira un bista riba e página aki pa mas informashon tokante e prosedimentu di kambio

E monedanan di florin karibense tin e siguiente denominashonnan: 5 florin, 1 florin, 50 sèn, 25 sèn, 10 sèn, 5 sèn i 1 sèn. Pa biyete, e denominashonnan lo ta 200 florin, 100 florin, 50 florin, 20 florin i 10 florin.

Na lugá di e papel di NAf. 250 florin, lo introdusí un papel di 200 florin karibense i na lugá di e papel di NAf. 25, lo bini unu di 20 florin karibense. E denominashonnan nobo akí pa biyete ta pas mihó ku loke bo ta topa generalmente den e sistemanan di pago internashonal, por ehèmpel di euro i dòler.

E biyetenan di Florin Karibense tin un kantidat di karakterístika ku ta asistí persona ku limitashon di bista, pa rekonosé e diferente denominashonnan. E karakterístikanan di aksesibilidat ku tin riba e biyetenan ta inkluí:
‍
Markanan tokabel. Tin strepi elevá na e rantnan na man robes i drechi di e biyetenan parti dilanti. Por distinguí e denominashonnan via di e kantidat di strepi.
Number grandi. E diseñonan tin number grandi pa klaramente mustra e denominashon. E numbernan grandi tin enk elevá tambe pa fásilmente identifiká e balor di e biyete.
Koló briante. Tur biyete tin un koló dominante.

E símbolo di e moneda di florin karibense ta Cg. Pa florin antiano a usa NAf.

Sin embargo, e kódigo ofisial den sistemanan di pago ta XCG. Motibu pa esaki ta ku e kódigo ISO ofisial di monedo pa mas di un pais (kual ta e kaso pa Kòrsou i Sint Maarten), semper ta kuminsá ku un 'X'. E kódigo di moneda ofisial pa florin antiano ta ANG.

E biyetenan ta di katuna, meskos ku esnan di florin antiano. Sin embargo, e biyetenan nobo lo ta di mihó kalidat i mas duradero. Esei ta nifiká ku e biyetenan di florin karibense lo keda bon mas tempu i, p’esei, e kantidat di biyete ku mester produsí atraves di tempu lo ta ménos. Debí ku lo tin un bahada den tantu produkshon komo destrukshon di biyete, uso di e papel duradero akí lo kontribuí na un medioambiente mas limpi.

E nòmber florin karibense ta stipulá den e “Regeling Gemeenschappelijk Geldstelsel Curaçao en Sint Maarten. Inisialmente, a akordá e nòmber 'Florin Karibe Hulandes'. Pero, komo ku Karibe Hulandes geográfikamente ta inkluí islanan BES i Aruba, a skohe pa e nòmber 'Florin Karibense' den e areglonan akí.

Un di e bentahanan di e florin karibense nobo ta ku - dor di e diseño sofistiká i e karakterístikanan di seguridat modèrno i di kalidat haltu - e biyete- i monedanan ta sigurá kontra falsifikashon. Esaki ta limitá e probabilidat pa froude òf pèrdida ora di usa sèn kèsh.

Riba e página aki bo por lesa mas tokante e elementonan di seguridat di e biyetenan di florin karibense.

Royal Canadian Mint ta produsí i entregá e monedanan i Crane Currency ta imprimí i entregá e biyetenan.

E derecho di outor ta den man di Centrale Bank van Curaçao en Sint Maarten. Pa e kondishonnan pa reprodukshon bishita e página aki.