Diseño di e florin karibense nobo ta inspirá pa mundu bou di awa. Banda dilanti di e biyetenan por mira e mundu vibrante bou di e awanan di Kòrsou i Sint Maarten, simbolisando e union di e dos paisnan. E bida diverso i úniko ku tin den laman ta kòrda nos ku, ounke nos kada un tin nos propio identidat, kolaborashon i e metanan ku nos tin en komun ta uni nos. Banda patras di e biyetenan, por mira algun monumento históriko i kultural di ámbos pais.
E biyetenan ta diseñá ku un orientashon tradishonal horizontal na e banda dilanti, i ku un orientashon inovativo vertikal na e banda patras. Ta promé bia ku Kòrsou i Sint Maarten tin biyete ku orientashon vertikal.
E seri di biyete di florin karibense ta konsistí di 5 biyete di e siguiente denominashonnan: Cg 10, Cg 20, Cg 50, Cg 100, and Cg 200. Kada denominashon tin un koló spesífiko.
E biyete di 10 florin karibense ta predominantemente hel i ta ilustrá un Chamba na banda dilanti i Faro di Klein Kòrsou na banda patras.
E biyete di 20 florin karibense ta predominantemente blou i ta ilustrá dos Chuchu Águila na banda dilanti i Simpson Bay Lagoon na banda patras.
E biyete di 50 florin karibense ta predominantemente bèrdè i ta ilustrá un Turtuga Blanku na banda dilanti i Playa Kenepa Grandi na banda patras.
E biyete di 100 florin karibense ta predominantemente kòrá i ta ilustrá un Gutu Barika Kòrá na banda dilanti i Korte di Hustisia "The Courthouse" na banda patras.
E biyete di 200 florin karibense ta predominantemente lila i ta ilustrá dos Kabai di Awa na banda dilanti i Brùg di Ponton na banda patras.
Eksplorá e detayenan i deskubrí nan diseño úniko riba e página di moneda.
Download e èp grátis i eksplorá nos tesoronan di Karibe.
