Kada biyete di Cg tin un koló distinto. E koló di Cg 50 ta predominantemente bèrdè.
Turtuga blanku ta presentá den tur laman tropikal i suptropikal na mundu, inkluso den Karibe. Turtuga blanku ta herbívoro. Nan ta kome prinsipalmente yerba di laman. Danki na nan, yerba di laman no ta krese bira muchu largu te sofoká. Asina, e ekosistema di yerba di laman por sigui kumpli ku su funshonnan prinsipal, komo nèshi di un kantidat grandi di espesie den laman. P’esei mes, turtuga blanku ta un espesie klave pa nos oséanonan por keda salú. E machunan no ta subi tera nunka mas. E muhénan ta subi tera solamente pa pone webu. Turtuga muhé ta traha nèshi vários biaha pa aña. Rònt mundu, turtuga ta espesie protegé i den peliger.
Arcopagia fausta. Ta topa e kokolishi di dos kaska akí na tur parti di Karibe, prinsipalmente te 30 meter di profundidat. Nan mes ta forma nan kaska di kokolishi i algun di nan por bira basta grandi, asta 8 centimeter hanchu. Nan kaska ta koló krèm òf blanku, ku ondulashon leve strepi strepi, serka di otro. Parti paden di nan kaska ta hel. Generalmente, e dos bandanan di e kas di kokolishi ta fet bon riba otro. Hopi bes, e kas ta kubrí ku lima i otro organismo, ku ta sirbi bon komo kamuflahe riba ref. E espesie akí ta chupa awa di laman, filtra e kuminda ku tin den dje anto ‘skupi’ awa limpi
Playa Kenepa Grandi. Kòrsou ta konosí pa su playanan relativamente chikitu skondí den bahia trankil. Asta Kenepa Grandi ta situá den un bahia. Santu di e playanan ta konsistí entre otro di sushi di piská i otro organismo di laman ku ta kome lima. Segun ku nan ta skrap lima kita for di piedra di koral i di kalki, nan ta lòs pida pida kalki tambe ku ta sali bèk den nan sushi komo klòmpi chikitu di kalki, i ola di laman ta depositá esakinan komo santu blanku riba playa. Un di e espesienan ku ta responsabel pa e proseso akí ta gutu.
