Kada biyete di Cg tin un koló distinto. E koló di e Cg 10 ta predominantemente hel.
Chamba por krese bira te 60 centimeter largu. E espesie akí tin kurpa ku forma di tayó i un kabes relativamente grandi. Chamba adulto ta shinishi kla, ku punta pretu rònt nan kurpa. Nan kabes ta shinishi kla i nan boka ta un poko mas kla. Pero ora nan ta yòn ainda, nan ta pretu ku sinku strepi vertikal koló hel bibu riba nan kurpa. Generalmente, bo ta topa e yònnan na ref òf den vèlt di yerba di laman, komiendo parasit for di riba kurpa di otro piská, manera kabaron pikipieu tambe sa hasi. Normalmente, e adultonan ta biba riba ref. Ta topa nan na te 30 meter di profundidat.
Karkó ta un espesie di kokolishi ku ta biba prinsipalmente riba vèlt di yerba di laman i den e áreanan kaminda tin santu. Nan por bira basta grandi. Un karkó adulto por bira mas o ménos 35 centimeter largu. E espesie di kokolishi akí ta herbívoro. Nan ta kome material vegetal ku nan ta haña meimei di yerba di laman. Karkó ta birando mas i mas skars na hopi parti di Karibe, debí ku nan karni ta un berdadero delikatès ku hende ta konsumí na gran kantidat. P’esei mes, tin vários inisiativa pa brui nan den koutiverio, sea pa kuminda òf pa laga nan bai despues den naturalesa. Kasi bo no ta topa karkó adulto mas den e awanan di Kòrsou.
Faro di Klein Kòrsou ta un edifisio masha karakterístiko di e isla ei. Por mir’é djaleu ora bo ta yegando riba boto. Mas serka bo yega di Klein Kòrsou, mas bo ta komprondé dikon, asta den nos tempu moderno, un faro ta asina esensial pa evitá ku bo ta pega ku bo boto riba kosta, mirando ku e isla ta asina plat. E faro tin un lus LED ku ta avisá barku den anochi pa nan no pega riba e kosta peligroso. E edifisio mes ta un monumento ofisial. A konstruyé na 1877 debí na e kantidat di kibramentu di barku ku tabatin despues ku un orkan a destruí e faro original e aña ei. E faro nobo a pasa den vários rekonstrukshon i reparashon. Aktualmente, e faro ta bashí i ta habrí pa turista.
