Kada biyete di Cg tin un koló distinto. E koló di Cg 20 ta predominantemente blou.
Chuchu águila ta un di e espesienan di chuchu mas grandi ku tin den nos awanan. Di un punta di ‘ala’ pa otro, nan por midi kasi tres meter. Bo ta rekonosé nan fásil na nan koló skur, dòrná ku un kantidat di mancha blanku, i nan barika kompletamente blanku. E chuchunan akí tin un rabu largu i puntá, ku vários spiña ku por ta venenoso. Nan ta kome diferente animal, manera kokolishi di dos kaska, ku tin den santu den fondo di laman. Nan ta koba den santu òf waya e santu ku nan ‘alanan’. Ademas, nan ta kome kangreu, sòldachi i kokolishi, manera karkó. Chuchu águila ta bestia masha sosial. Nan gusta landa den grupo chikitu.
Kouri ta kokolishi ku ta biba den mayoria di laman tropikal. Vários espesie di kouri a hunga papel importante den komèrsio i kultura, pasobra tabata usa nan kas di kokolishi komo medio di pago, prinsipalmente na China, Áfrika, Nieuw-Guinea i Indonesia. P’esei mes, e barkunan di Verenigde Oost-Indische Compagnie (VOC) tabata hasi komèrsio i paga ku e tipo di kokolishinan akí, spesífikamente ku e espesie Monetaria moneta, ku tabatin balor monetario. Tabata us’é, entre otro, pa kumpra hende sklabisá. Awendia, hende ta interesá den e kokolishinan akí prinsipalmente pa kolekshoná nan i komo adorno. E kokolishinan tin un dieta spesífiko. Tin ku ta karnívoro, otro ta herbívoro i algun di nan ta omnívoro. Pa kome, nan ta usa un struktura masha pekuliar den nan boka ku yama ‘rádula’. E ta manera un djente. Kuné, nan por raspa kuminda for di riba un superfisie i kòrta e kuminda.
E frontera entre Parti Hulandes i Parti Franses di isla di Sint Maarten ta kore meimei di Simpson Bay. Un parti di e lagun ta bou di protekshon internashonal for di 2014. E protekshon akí ta importante ya ku e vèltnan di yerba di laman den e lagun ta vulnerabel. Sint Maarten su aeropuerto internashonal, Princess Juliana Airport, ta situá banda di Simpson Bay. Regularmente tin yate i otro embarkashon ta bin skonde den e lagun ora mal tempu i orkan ta pasa den Karibe.
