Kada biyete di Cg tin un koló distinto. E koló di Cg 100 ta predominantemente kòrá.
Gutu ta konosí komo e bakanan di ref di koral. Nan ta usa e strukturanan skèrpi den nan boka pa skrap lima for di riba koral, evitando asina ku lima ta krese di mas i afektá e ekosistema. Na mes momento, e komportashon akí ta yuda produsí mas santu blanku pa nos playanan. Gutu por bira basta grandi. Gutu adulto tin un aspekto bastante diferente for di esunnan yòn. Ora nan ta yòn ainda, tantu machu komo muhé generalmente ta koló bèrdè-shinishi, ku un patronchi di blòki blòki i un barika koló kòrá bibu. Pero machu adulto ta koló hel-bèrdè i blou bibu, ku strepi oraño i hel. E muhénan por kambia bira machu despues den nan bida. Ku nan ta kambia di sekso òf nò ta dependé di faktor manera komposishon di e poblashon, mortalidat di e machunan i otro influensia ambiental.
Kokolishi di músika ta un di e espesienan di kokolishi karibense ku ta traha un kas pa skonde aden. Den awa, e kokolishi akí ta kubrí ku lima i otro organismo, bon kamuflá sea den santu òf riba ref. Si bo topa un di e kokolishinan akí na un playa (aunke no a sobra mashá), lo bo ripará ku e tin un patronchi di strepi riba e kas ku parse partitura musikal. Ta djei e nòmber a bin. E espesie akí ta karnívoro i ta bon yagdó tambe. Nan ta yag na diferente profundidat den laman. Entre otro, nan ta kome otro espesie di kokolishi, kabaron i, tin biaha, bestia morto.
Korte di Hustisia na Sint Maarten, mihó konosí komo ‘the Courthouse’, ta un di e símbolonan nashonal di e pais. E ta aparesé riba bandera di Sint Maarten, i riba e eskudo nashonal tambe e edifisio akí ta figurá prominentemente. E edifisio original a ser konstruí na 1793 i a ser remodelá i drechá na diferente okashon. Hopi tormenta tropikal i orkan a yega di okashoná daño grave na e edifisio. Den e siglonan for di dia di su konstrukshon, el a kumpli ku diferente funshon, entre otro, komo warda di polis i prizòn.
